სერიალში გაცოცხლებულია მე-20 საუკუნის 50-იანი წლების ბოლო - ესპანური მოდის ოქროს ხანა. 50-იანი წლების ესპანეთში არის ადგილი - „გალერეა ველვეტი“, სადაც იმ დროისთვის ყველაზე მოდური, ელეგანტური და მდიდრული ტანსაცმელი იკერება. ყველას ოცნებაა ამ გალერეაში მოხვედრა. ულამაზესი მადრიდი და მოდის ინდუსტრია - სიუჟეტი ამ გალერეაში მომუშავე ადამიანების გარშემო ტრიალებს. ვითარდება დამაინტრიგებელი სიყვარულის ამბავი - ახალგაზრდა, მოკრძალებული გოგონა ანა მშობლების გარდაცვალების შემდეგ მადრიდში, ბიძასთან გადადის საცხოვრებლად და გალერეაში მკერავად იწყებს მუშაობას. მას თავდავიწყებით უყვარდება გალერეის მფლობელი და ოჯახური ბიზნესის ახალგაზრდა გამგრძელებელი ალბერტო. წყვილის ბედნიერებას ხელს უშლის როგორც მათი განსხვავებული სოციალური მდგომარეობა, ასევე ალბერტოს საცოლე კრისტინა. ანას და ალბერტოს არ შეუძლიათ ერთად ყოფნა, მაგრამ ერთმანეთის გარეშეც ვერ ძლებენ.